ལེའུ་དང་པོ། རེག་པ་རྩ་ལ་ངོས་བཟུང་ནས་བརྟག་པའི་ཐབས་བསྟན་པ།
དུས་ཚོད། 2012-09-13 14:21:51 ཀློག་གྲངས་ཐེངས།1736

གཉིས་པ་ལན་གྱིས་རྒྱས་པར་བཤད་པ་ལ། རེག་པ་རྩ་བཤད་པ། མཐོང་བ་ཆུ་བཤད་པ། གལ་འགག་བཞི་བཤད་པའོ། །དང་པོ་ལའང༌། མདོར་བསྟན་པ་དང༌། རྒྱས་པར་བཤད་པ། མཇུག་བསྡུ་བའོ། །དང་པོ་ནི། སྟོན་པས་ཞེས་པ་ནས་རེག་པའི་མདོར་བསྟན་ཡིན་ཞེས་པའི་བར་གྱིས་བསྟན་ཏེ། དེའང་ཡིད་ལས་སྐྱེས་ཀྱིས་ཇི་ལྟར་དྲིས་པ་བཞིན་དུ། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ། དྲང་སྲོང་ཆེན་པོ་ཡིད་ལས་སྐྱེས། ནད་བརྟག་པ་རྣམས་ཀྱི་ནང་ནས་དང་པོ་སོར་མོས་རེག་པ་འཕར་རྩའི་སྒོ་ནས་ནད་ལ་བརྟག་པ་འདི་ནི་ནད་རླུང་སོགས་དང༌། དེའི་གནས་ཚུལ་བརྟག་མཁན་སྨན་པ་གཉིས་ཀྱི་བར་དུ་འདི་ནི་རྣམ་པར་མ་གྱུར་པ་རང་བཞིན་ཐ་མལ་དུ་གནས་པའོ། །འདི་ནི་རྣམ་པར་གྱུར་པའོ། །འདི་ནི་འཕེལ་བའོ། །འདི་ནི་ཟད་པའོ། །འདི་ནི་འཁྲུགས་པའོ། །འདི་ནི་རླུང་ངོ༌། །འདི་ནི་མཁྲིས་པའོ། །འདི་ནི་བད་ཀན་ནོ། །ཞེས་བྱ་བ་ལ་སོགས་པའི་དོན་མ་ནོར་བ་བརྡ་སྦྱོར་བའམ། ངག་གི་འཕྲིན་སྨྲ་བའི་ཕོ་ཉ་བ་དང་འདྲ་བ་ནི། འཕར་བའི་རང་བཞིན་དུ་གནས་པའི་རྩ་འདི་རྣམས་ཡིན་ནོ། །ཞེས་བརྟག་པའི་གཞི་ངོས་བཟུང་བའོ། །རྩ་དེ་ལ་ཇི་ལྟར་བརྟག་པར་བྱ་བའི་ཚུལ་ལ། སྔོན་འགྲོ་ཟས་སྤྱོད་བསླབ་པ་ལ་སོགས་སྤྱི་དོན་བཅུ་གསུམ་ཡོད་པ་ས་བཅད་ཙམ་སྟེ་རྟོགས་པར་སླའོ།།

གཉིས་པ་རྒྱས་པར་བཤད་པ་ལ་བཅུ་གསུམ་ཡོད་པའི། དང་པོ་སྔོན་འགྲོ་ནི། དང་པོ་ཞེས་པ་ནས་གཅེས་པ་ཡིན་ཞེས་པའི་བར་གྱིས་བསྟན་ཏེ། རྩ་བལྟ་བ་ལ་ས་བཅད་བཅུ་གསུམ་ཡོད་པའི་དང་པོ་སྔོན་འགྲོའི་ཆོ་ག་ཟས་སྤྱོད་ཀྱི་སྤང་བླང་བསླབ་པ་ནི། སང་ཞོགས་རྩ་བལྟ་བའི་དོ་ནུབ་ནས་ནད་པ་ནད་མེད་གང་ཡིན་ཀྱང་ཤ་ཆང་སོགས་དྲོད་བཅུད་ཆེ་བའི་བཟའ་བཏུང་དང༌། མེ་ཉི་ལ་བྱུག་པ་དྲག་པོ་བྱེད་པ་དང༌། སྔོ་ངད་རུལ་སུངས་སོགས་འཇུ་དཀའ་བའི་རིགས་དང༌། ཇ་དང་ར་ཕག་གི་ཤ་ལ་སོགས་པ་བསིལ་ཆེ་བའི་བཟའ་བཏུང་རྣམས་ཀྱིས་ནད་གཞི་གསར་དུ་འཁྲུགས་པར་འགྱུར་བས་སྤང་བར་བྱ་ཞིང༌། བསིལ་དྲོད་སྙོམས་པའི་བཟའ་བཏུང་ཡིན་ཀྱང་ཧ་ཅང་འགྲངས་ཆེས་པ་དང༌། ལྟོགས་ཆེས་པ་དང་བུད་མེད་དང་ལྷན་དུ་ཉལ་པོ་བྱས་པ་དང༌། བྱ་ལས་ཀྱིས་གཉིད་ཆག་པ་དང༌། ཁ་ཏོན་ལ་སོགས་པ་སྨྲ་བརྗོད་མང་བ་དང༌། མྱ་ངན་དང་ཡིད་མི་བདེ་བ་སོགས་སེམས་ལས་དང༌། འགྲོ་འདུག་ལ་སོགས་ཏེ་མཐའ་གཉིས་དང་ལྡན་པའི་ཟས་སྤྱོད་རྣམས་སྤང་ནས་ལེགས་པར་བརྟག་པ་དེ་ཡིས་ནི་ནང་གི་འདུ་བ་རྣམས་མི་འཁྲུགས་ཤིང་གསལ་པོར་སྟོན་ནོ། །ཞེས་སྤྱིར་བཏང་ནས། དམིགས་བསལ་དུ་དེ་ལྟ་བུའི་ལོང་མེད་པའི་ནད་པ་གློ་བུར་དུ་བྱུང་བ་རྣམས་ལ་བརྟག་དགོས་པ་བྱུང་ན་ཡང་ནད་པ་དང་སྨན་པ་གཉིས་ཀའི་དབུགས་ཆད་དང་རྩོལ་བས་མ་དུབ་པའི་སྔར་མལ་དུ་ཆུད་པ་སོགས་ནད་པའི་རྩ་དཔངས་རྐྱེན་སྣ་ཚོགས་ཀྱིས་མ་བཏེག་པ་ཞིག་ཅིས་ཀྱང་གཅེས་པར་བཟུང་ལ་བརྟག་དགོས་པ་ཡིན་ནོ། །གཉིས་པ་བལྟ་དུས་བཤད་པ་ལ་གཉིས། གཞན་ལུགས་མི་འཐད་པ་དགག་པ་དང༌། གཞུང་དོན་བཤད་པའོ། །

དང་པོ་ནི། བྲང་ཏི་དཔལ་ལྡན་འཚོ་བྱེད་སོགས་ཁ་ཅིག དུས་དོན་སྣོད་ཚ་གྲང་གཡས་གཡོན་ཕོ་མོ་ན་ཚོད་རྣམས་ཀྱིས་བྱེད་པས་གདགས་སྲིབས་གཉིས་སུ་འགྱུར་ཏེ། དབྱར་རྩ་སྦོམ་ཞིང་རིང་ཞེས་སོགས་སོ་སོར་ཕྱེ་ནས། དེ་དག་མཉམ་པའི་དུས་ནི་རི་རྩེར་ཉི་ཤར་ཏེ། དུས་མཚམས་དབུགས་སྙོམས་པ་རྩ་མལ་ན་སོ་སོར་གནས་པ་ཞེས་བྱ་བ་ཡིན། དབུགས་ནི་རྩ་རླུང་འབྱུང་འཇུག་གི་ངོ་བོ་གཅིག་ཡིན་པའི་ཕྱིར། ཞེས་སོགས་མང་དུ་ཟེར་རོ། །དེ་ལ་དབྱར་སྟོན་གྱི་རྩ་གདགས་དང་དགུན་དཔྱིད་ཀྱི་རྩ་སྲིབས་ཡིན་པ་ལ་རྒྱུ་མཚན་ཅི་ཡང་མེད་དོ། །ཡོད་དུ་ཆུག་ཀྱང་ཞོགས་པ་རྩ་ལྟ་བའི་དུས་ལ་སྦྱོར་བ་མི་འཐད་དོ། །གལ་ཏེ་འཐད་པ་ལྟར་ན། ནམ་ཟླ་དབྱར་སྟོན་དགུན་དཔྱིད་བཞིའི་དབུགས་སྙོམས་ཞེས་པ་དུས་བཞི་ལ་དབུགས་ཡོད་པ་ཡིན་ནམ། དེ་དུས་ཀྱི་མིའི་དབུགས་ལ་འདོད། དང་པོ་ལྟར་ན་དུས་བཞི་གང་ཟག་ཏུ་ཐལ་ཞིང༌། དུས་བཞིའི་མིའི་དབུགས་ལ་འདོད་ན་ནི། དཔེར་ན་དཔྱིད་ཟླ་ར་བའི་ཚེས་གཅིག་གི་ཞོགས་པ་རྩ་བལྟ་བའི་དུས་དེར་དབྱར་སྟོན་དགུན་དཔྱིད་བཞི་ཀའི་མིའི་དབུགས་སྙོམས་ཐུབ་པའི་སྐབས་ཨེ་འདུག །སྤྲུལ་པ་ཡིན་ན་མ་གཏོགས་རི་རབ་ཁབ་མིག་ཏུ་འཇུག་པ་དང་ཁྱད་པར་མེད་དོ། །དེ་བཞིན་དུ་གཡས་གཡོན་ཕོ་མོ་ན་ཚོད་རྣམས་ལ་སྦྱར་བའང་དོན་མ་ཡིན་ཏེ། བཀྲེས་པས་ཉེན་པ་ལ་རྒྱ་གར་ནག་གི་གཏམ་དང་མཚུངས་སོ། །

གཞན་ཡང་དུས་བཞིའི་རྩ་ལ་ཁམས་ལྔའི་འབྱུང་བ་རིམ་བཞིན་བརྩི་བ་སོགས་མི་འགྱུར་བའི་གཟེར་རྣམས་དགོས་མེད་དུ་ཐལ་ཏེ། རི་རྩེ་ཉི་ཤར་གྱི་དུས་གཅིག་ཁོ་ནར་དུས་བཞི་གའི་དབུགས་རྣམས་མཉམ་པར་རྒྱུ་ལ། རྩ་དང་དབུགས་རླུང་འབྱུང་འཇུག་གི་ངོ་བོ་གཅིག་ཡིན་པའི་ཕྱིར། རྩ་དང་དབུགས་རླུང་འབྱུང་འཇུག་གི་ངོ་བོ་གཅིག་པའང་མ་ཡིན་ཏེ། ཕྱི་ནང་དབུགས་ལ་ལན་ལྔ་འཕར་བར་འདོད། ཅེས་གསུངས་པའི་ཕྱིར། ཡང་ན་དུས་བཞིའི་རྩ་ལ་གདགས་སྲིབས་སམ་སྦོམ་ཕྲ་སོ་སོར་འབྱེད་པ་དང༌། དེ་རྣམས་མཉམ་པར་བཞག་པ་གཅིག་ལ་རྒྱུ་ཟེར་བ་འགལ་བ་ཡིན་ཏེ། དཔེར་ན་དཔྱིད་ཟླ་འབྲིང་པོའི་ཚེས་བཅོ་ལྔའི་ཞོགས་པ་རྩ་བལྟ་བའི་ཚེ། དཔྱིད་ཀའི་དུས་རྩ་ཕྲ་བ་དེ་དང་དབྱར་གྱི་རྩ་སྦོམ་པ་དེ་གཉིས་མཉམ་པར་རྒྱུ་ན། དུས་རྩ་ལྔ་པོ་སོ་སོར་ངོས་ཟིན་པའི་སྐབས་མི་སྲིད་པའི་ཕྱིར་རོ། །སྐབས་འདིར་སྟོད་སྨན་ལ་སོགས་པ་མང་པོས་རྒྱ་ཆེར་མ་བཤད་ལ། བྱང་པ་བཀྲ་ཤིས་དཔལ་བཟང་པས། ནམ་ལངས་འབྱུང་བ་མཉམ་པའི་དུས། །ཟས་སྤྱོད་འཁྲུགས་ན་ངེས་པ་མེད། །ཉིན་མཚན་རོ་རྐྱང་རང་བཞིན་སྤང༌། །ཐོ་རངས་དབུ་མའི་དུས་སུ་བལྟ། །ཡར་མཐའ་སྐྱ་རེངས་ཤར་བ་ནས། །མར་མཐའ་རི་རྩེའི་ཉི་ཤར་བར། །དེའི་དུས་སུ་འཚམ་པར་སྨྲ། ཕྱི་ཡི་དབུགས་ནི་རླུང་ཡིན་ལ། །ནང་གི་དབུགས་ནི་དྲོད་དུ་བཤད། །གདགས་ནི་ཉིན་མོ་གཞན་པ་སྲིབས། །ཚ་དང་གྲང་བའང་གདགས་སྲིབས་ཏེ། །སྙོམས་པ་རྩ་མལ་གནས་དུས་བལྟ། །ཞེས་ཟེར་རོ། །དེ་ལ་ནམ་ལངས་འབྱུང་བ་བཞི་སྙོམས་པའི་དུས། ཞེས་པ་ནམ་ལངས་མ་གཏོགས་འབྱུང་བཞི་མི་སྙོམས་ན་ཉིན་མཚན་གཉིས་ཀར་མི་འཐད་དམ། ནད་པ་འབའ་ཞིག་ཏུ་ཐལ་ལ། ཉིན་མོ་རོ་མ་དང་མཚན་མོ་རྐྱང་མ། ཐོ་རངས་དབུ་མའི་དུས་ཞེས་པ་འདི། ཉིན་མཚན་དང་ཞོགས་པ་གསུམ་པོའི་དུས་ལ་སྦྱོར་རྒྱུ་ཡིན་ནམ། རྩ་བལྟ་ཡུལ་གྱི་མི་ལ་སྦྱོར་རྒྱུ་ཡིན། དུས་ལ་སྦྱོར་རྒྱུ་ཡིན་ན་ངོ་མཚར་ཆེ་སྟེ། ཁྱོད་སངས་རྒྱས་ལས་ཀྱང་མཁས་པ་ཞིག་ལ། མི་ལ་སྦྱོར་ན་ལག་པའི་བལྟ་རྩ་ལ་སྦྱོར་རམ་སྣའི་དབུགས་ལ་སྦྱོར། དང་པོ་མི་འཐད་དེ། ལག་པའི་བལྟ་རྩ་ལ་རོ་རྐྱང་དབུ་གསུམ་གྱི་རླུང་རྒྱུ་བར་སྨན་དཔྱད་གསང་སྔགས་གང་ནས་ཀྱང་མ་བཤད་ཅིང༌། རོ་རྐྱང་དབུ་གསུམ་པོ་བསྡོམས་པའི་དབུགས་གཅིག་ལ་བལྟ་རྩ་ལན་ལྔ་འཕར་གསུངས་པས་གྲངས་ཀྱང་མི་འགྲིག སྣ་སྒོ་ནས་རྒྱུ་བ་ལ་སྦྱོར་ན་ནི་ཉིན་མཚན་གཉིས་ལ་རོ་རྐྱང་དང་ཐོ་རངས་དབུ་མའི་རླུང་རྒྱུ་བའི་ངེས་པ་མེད་དེ། ཉིན་ཞག་རེ་ལ་འཕོ་ཆེན་བཅུ་གཉིས་དང༌། འཕོ་ཆེན་རེ་ལ་འཕོ་ཆུང་ལྔ་ལྔ་ཡོད་པའི་འཕོ་ཆུང་རེ་ལ་སུམ་བརྒྱ་དྲུག་ཅུ་རེ་རྒྱུ་བ་ལས་རླུང་དང་ཡེ་ཤེས་ཀྱི་རླུང་འདྲེས་པ་མ་གཏོགས་ཡེ་ཤེས་ཀྱི་རླུང་ཟུར་དུ་ཕྱེ་ནས་རྒྱུ་བ་མེད་ཅིང༌། མདོར་ན་ལས་རླུང་ཕྱེད་དང་སོ་གསུམ་རེ་ན་ཡེ་ཤེས་ཀྱི་རླུང་གཅིག་ལས་མི་རྒྱུ་བའི་ཕྱིར་མི་ཤེས་པའི་རྟོག་གཟོ་ལས་གཞན་མ་ཡིན་ནོ། །ཐོ་རངས་དབུ་མའི་དུས་སུ་བལྟ་ཞེས་པའི་ཐོ་རངས་ཀྱང་ཁྱོད་ཀྱིས་ངོས་ཟིན་ཏེ། ཡར་མཐའ་སྐྱ་རེངས་ཤར་བ་ནས། །མར་མཐའ་རི་རྩེ་ཉི་ཤར་བར། །ཞེས་སོགས་པ་ལ་ངོས་བཟུང་བའི་ཕྱིར། དེར་མ་ཟད་ཡར་མཐའ་སྐྱ་རེངས་ཤར་བ་ནས་ཞེས་པས་བལྟ་དུས་ཀྱི་ངོས་འཛིན་ཀྱང་འཁྲུལ་ཏེ། བལྟ་དུས་མཁའ་ལ་ཉི་ཤར་ཀླུངས་མ་ཕེབས། །ཞེས་པ་དང་དངོས་སུ་འགལ་བའི་ཕྱིར།།

གཞན་ཉིན་མཚན་དང་ཚ་གྲང་ལ་གདགས་སྲིབས་སུ་བཞག་ནས། ཐོ་རངས་སྙོམས་པའི་དུས་ཞེས་པ་རྨོངས་པའི་གཏམ་ཡིན་ཏེ། ཐོ་རངས་ཀྱི་དུས་སུ་མཚན་མོའི་དབུགས་ནི་འདས་ཟིན་ལ་ཉིན་མོའི་དབུགས་ནི་མ་འོངས་པ་འབྱུང་རྒྱུ་ཡིན་པའི་ཕྱིར་ན་ཅིའི་སླད་དུ་སྙོམས་པར་འགྱུར། ཚ་གྲང་ཡང་མི་སྙོམས་ཏེ་ཐོ་རངས་རླུང་ལྡང་བའི་དུས་ཡིན་པའི་ཕྱིར། བྱང་པ་བདག་པོ་ནི། སྐབས་འདིར་ནད་མེད་ཀྱི་གཞི་རྩ་བརྟག་པའི་སྐབས་ཡིན་ཞེས་པ་ཐ་ཆད་པ་སྟེ། ནད་གློ་བུར་བའམ་ནད་པ་དང་སྨན་པ་གཉིས་ཀ་ལ་ལོང་སྐབས་མེད་ན་མ་གཏོགས། གཞན་མ་གཅོང་སྡེ་བཞི་ལ་སོགས་པའི་ནད་གཞི་ཅན་རྣམས་ལའང་བལྟ་དུས་ཉིད་གཅེས་པར་གཟུང་དགོས་ཤིང༌། དེ་ལྟ་བུའི་སྒོ་ནས་ལན་མང་དུ་མ་བརྟགས་ན་ཇི་ལྟ་བར་ཤེས་པར་མི་འགྱུར་བས་སོ། །

གཉིས་པ་གཞུང་དོན་ནི། བལྟ་དུས་ཞེས་པ་ནས་གནས་དུས་བལྟ་ཞེས་པའི་བར་གྱིས་བསྟན་ཏེ། ངོ་མཚར་གྱི་རྩ་བདུན་བརྟག་པ་དང་ལོང་སྐབས་ཡོད་ན་ནད་པ་ལའང་རུང་སྟེ་སྤྱིར་བཏང་གི་དབང་དུ་བྱས་ནས་རྩ་བལྟ་བའི་དུས་ནི། གློ་བུར་གྱི་རྐྱེན་གྱིས་མ་བསྐྱོད་པ་ཐ་མལ་དུ་གནས་པ་ཞིག་ངེས་པར་དགོས་ལ། དེ་དུས་ནམ་ཞིག་འབྱུང་ཞེ་ན། ནམ་མཁའ་ལ་ཉི་མ་ཤར་བ་ཀླུངས་སུ་ཉི་ཟེར་མ་ཕེབས་པ། རྩ་བལྟ་ཡུལ་གྱི་མི་དེའི་ནང་གི་དབུགས་དྲོན་མོ་དེ་ཕྱིར་རིང་དུ་མ་རྒྱུས་པ། ཕྱིར་རྒྱུ་བའི་དབུགས་བསེར་བུ་དང་འགྲོགས་པའི་གྲང་མོ་དེ་ནང་དུ་མ་སོང་བ། མལ་ས་ནས་མ་འགུལ་བར་ཟོ་བདེར་གནས་པ། ཁ་ཟས་དང་བཏུང་བ་མ་འཐུངས་པ་སྟེ། ཁྱད་ཆོས་དྲུག་ལྡན་དེའི་སྐབས་སུ་འབྱུང་ཞིང༌། དུས་དེར་བལྟས་ན་ངེས་པར་གསལ་བའི་རྒྱུ་མཚན་དངོས་ནི། གདགས་སྲིབས་དབུགས་སྙོམས་ཞེས་པ། འོག་ཏུ། ཡར་ཟུར་དོན་ལྔ་ཕྱིར་རྒྱུ་གདགས་ཀྱི་རྩ། །མར་ཟུར་སྣོད་དྲུག་ནང་རྒྱུ་སྲིབས་ཀྱི་རྩ། །ཞེས་གསུངས་པའི་དོན་གྱིས། དོན་ལྔའི་རླུང་ལ་གདགས་དང་སྣོད་དྲུག་གི་རླུང་ལ་སྲིབས་ཞེས་པའི་ཐ་སྙད་བཏགས་པ་དོན་བློ་ལ་འཆར་བདེ་བ་ལ་དགོངས་པ་ལྟར། ཁྱད་ཆོས་དྲུག་ལྡན་གྱི་དུས་དེར་ནང་དོན་སྣོད་དེའི་རླུང་རྣམས་ཀྱང་རྐྱེན་གྱིས་མ་སླད་པར་རང་སོར་གནས་པའི་ཕྱིར་རྒྱུ་བའི་སྣ་སྒོའི་དབུགས་ཀྱང་སྙོམས་ལ་ལག་པའི་རྩ་ཡང་ཐ་མལ་དུ་གནས་པར་འགྱུར་བ་ཡིན་པས་ན་དུས་དེར་རྩ་ལྟ་བར་བྱེད་དགོས་པ་ཡིན་ནོ།།

གསུམ་པ་བལྟ་གནས་བཤད་པ་ལ། གཞན་ལུགས་མི་འཐད་པར་དགག་པ་དང༌། གཞུང་དོན་གཉིས་ལས། དང་པོ་ནི། བྲང་ཏི་དཔལ་ལྡན་འཚོ་བྱེད་སོགས་ཁ་ཅིག སྟོད་སྨད་དོན་སྣོད་ཐམས་ཀྱི་རྩ་དེར་མི་རྒྱུ་བས་འགལ་ལོ་ཞེ་ན། རྩ་ནི་ལུས་ཀྱི་མགོ་མཇུག་ཕྱི་ནང་དོན་སྣོད་ཀུན་ཏུ་འབྲེལ་བ། ཚོང་འདུས་ཀྱི་རྒྱ་སྲང་བཞིན་ཡིན་ལ། རྩའི་ནང་དུ་རླུང་ཁྲག་ཐམས་ཅད་ཀུན་ཏུ་རྒྱུ་བ་ཚོང་དཔོན་རྒྱ་གར་ནག་ཡུལ་ཀུན་ཏུ་འགྲོ་འོང་བྱེད་པ་དེས་གནས་གང་དང་གང་ན་མ་བདེ་བའི་ཚུལ་གཏམ་དུ་བརྗོད་པ་བཞིན། རྩ་ནང་གི་རླུང་དེས་ལུས་འདི་ལ་གང་ན་པའི་རྟགས་འཆར་བ་ཡིན་ཏེ། དཔེར་ན་རིའི་ངོས་ན་མི་རོ་རུལ་པ་ཞིག་ཡོད་དེ་ཞེས་སོགས་དང༌། སྤྱིར་དེ་ལྟར་ཡིན་ཡང་དོན་ལྔ་སྣོད་དྲུག་གི་རྩ་དེར་མི་རྒྱུ་སྟེ། རྩ་ཕྲ་མོ་བཅུ་གཉིས་སྡོམས་པའང་མིན་ལ།རྩའི་རྒྱུད་གཅིག་ཁོ་ན་ལ་ཕྲེད་དུ་རྩ་བཅུ་གཉིས་ཀྱང་མིན་ཞེ་ན། རྩའི་རྒྱུན་གྱི་ངོ་བོ་གཅིག་ཀྱང་དོན་སྣོད་ཀྱི་རྩ་རྣམས་ཐ་དད་དུ་ཡོད་པ་མི་འགལ་ཏེ། རེ་བའི་རྒྱུད་གཅིག་ཀྱང་ཚོན་གྱིས་ཁ་དོག་བསྒྱུར་བའི་རེ་སོའི་རྣམ་པ་ཐ་དད་སྣང་བ་བཞིན་ཡིན་ལ་ཞེས་ཟེར་རོ། །དེ་ལ་སྟོད་སྨད་དོན་སྣོད་ཐམས་ཅད་རྩ་དེར་མི་རྒྱུ་བས་འགལ་ལོ་ཞེས་དོགས་པ་ཁོང་ནས་བསླང་བའི་ལན་དུ། རྩའི་རྒྱུན་གྱི་ངོ་བོ་གཅིག་ཀྱང་དོན་སྣོད་ཀྱི་རྩ་རྣམས་ཐ་དད་དུ་ཡོད་པ་མི་འགལ་ཞེས་པས་དོགས་པ་དེ་སྤོང་མ་ཐུབ་པའི་ཁར་ཁས་བླང་པར་སོང་བས་ནོངས་ལ། རྩ་དེ་རྒྱ་སྲང་ལྟ་བུ་ཡིན་དུ་ཆུག་ཀྱང༌། ཚོང་དཔོན་དང་རླུང་ཁྲག་དཔེ་མི་མཚུངས་ཏེ། སྤྱིར་གྱི་བལྟ་རྩ་འདིའི་ནང་དུ་རླུང་ཁྲག་གཉིས་ཀ་རྒྱུ་བ་མེད་ཅིང༌། ཡོད་དུ་ཆུག་ནའང་རླུང་ཁྲག་དེ་སྤྱི་བོ་ནས་རྐང་མཐིལ་བར་ཇི་ལྟར་རྒྱུ་བར་ནུས། དེ་ལྟར་རྒྱུ་མ་ནུས་ན་མགོ་བོའི་ནད་རྟགས་འཆར་བའི་རྒྱུ་མཚན་སོམས་ཤིག དེས་ན་མི་རོ་རུལ་པའི་དྲིའི་དཔེ་ཡང་དོན་མེད་དུ་སོང་ལ། དོན་ལྔ་སྣོད་དྲུག་དེར་མི་རྒྱུ་ཞེས་པའི་དགོས་པ་འདི་ནི་བ་ལང་རྫི་བོ་ལ་ཡང་ཨེ་འཆར། རེ་བའི་རྒྱུ་གཅིག་ཀྱང་ཚོན་གྱི་ཁ་དོག་གིས་ཞེས་པས་རེ་སོའི་དོན་ཙམ་ཡང་མ་གོ་བའི་ཁར་རྩ་ཚོན་སྐུད་ལྟར་འདོད་པར་སྣང་བས་འོག་ཏུ་དགག་པར་བྱའོ།།

ཡང་བྱང་པ་བདག་པོ་ན་རེ། དོན་ཡིད་ལ་འཆར་རྒྱུ་གོ་བདེ་བ་ནི། འཕར་རྩ་ཁོང་སྟོང་ཡངས་པའི་ནང་ནས་མར། །དོན་སྣོད་བཅུ་གཉིས་རླུང་ཁྲག་ཕྲེང་བ་བཞིན། །རྦ་རླབས་བཞིན་དུ་མ་འདྲེས་སོ་སོར་རྒྱུ། །ཞེས་ཟེར་རོ། །དེ་ལ་འཕར་རྩ་ཁོང་སྟོང་ཅན་དེ་སྙིང་གཅིག་པུའི་རྩ་ཡིན་ནམ། དོན་སྣོད་ཐམས་ཅད་ཀྱི་རྩ་ཡིན་ཞེས་འདྲི། དང་པོ་མི་འཐད་དེ། སྙིང་རྩ་གཅིག་པུའི་ནང་ན་དོན་སྣོད་ཐམས་ཅད་ཀྱི་རླུང་ཁྲག་རྒྱུ་བའི་སྐབས་མེད་ཅིང༌། གཉིས་པ་ལྟར་ན་ཁྱོད་རང་གིས་སྟོད་སྨན་གྱི་འདོད་པ་དགག་པར་དེ་དོན་ལྔ་སྣོད་དྲུག་གི་རྩ་མ་ཡིན་ཏེ་རླུང་རྩ་ཡིན་པའི་ཕྱིར་ཞེས་བཤད་པ་དང་འགལ། དེར་མ་ཟད་སྟོང་སྨན་ལ་ཁ་འཕངས་པའི་ཐལ་འགྱུར་ནི། རིག་པ་ལ་མ་བྱང་བའི་གཏམ་ཡིན་ཏེ། གསལ་བ་དོན་ལྔ་སྣོད་དྲུག་གང་གིའང་རྩ་མ་ཡིན་ན་དེ་ལས་ནད་རྟོགས་པ་འགལ། རྟགས་རླུང་རྩ་ཡིན་ན་རླུང་ཁྲག་རྦ་རླབས་བཞིན་དུ་རྒྱུ་བ་འགལ། ཁྱབ་པ་ནི། ལག་པའི་བལྟ་རྩ་ཁོ་ན་མ་ངེས་ཏེ་འཁོར་གསུམ་ག་ལ་ལན་མེད་དོ། །གཞན་ཡང་རླུང་ཁྲག་ཕྲེང་བ་བཞིན་དུ་རྒྱུ་བ་ཡིན་ན་གཡུ་ཐོག་གི་རྩ་དཔྱད་བུ་དོན་མ་ལས། རྩ་རྒྱུད་ཡུངས་ཀར་ཕྲེང་བསྣན་འདྲ། །མུ་ཏིག་ཕྲེང་བ་ཞེས་བྱ་སྟེ། །ལོ་ཡི་ནང་དུ་ཕལ་ཆེར་འཆི། །དེ་ལ་མ་ཤི་ཚེ་རྩར་འགྱུར། །ཞེས་གསུངས་པས་མི་ཐམས་ཅད་ལ་རྩ་རྒྱུད་མུ་ཏིག་ཕྲེང་བ་ཡོད་པར་ཐལ་བ་སོགས་འཐད་པའི་སྐབས་མི་སྣང་ངོ༌། །ཡང་བྱང་པ་བཀྲ་ཤིས་དཔལ་བཟང་པ་ན་རེ། ཚང་ཞིང་མ་འདྲེས་ཚོན་སྐུད་འདྲ། །ཆགས་པའི་ཐོག་མ་ལྟེ་བ་སྟེ། །དེ་བས་རིམ་བཞིན་མཐའ་ལ་གྱེས། །ཞེས་དང༌།

བཅུ་གཉིས་མ་འདྲེས་ཚོན་སྐུད་བསྒྲིལ་བ་འདྲ། །ཞེས་གཞུང་ལའང་རས་གཅོད་ཀྱིས་བཅོས་ཤིང༌། འཚོ་བྱེད་ཐུགས་རྗེ་དང་བྱ་བ་ནང་སོ་བཀྲ་ཤིས་རྣམ་རྒྱལ་བ་སོགས་ཀྱང་བལྟ་རྩ་གཡས་གཡོན་ལ་རྩ་ཁ་དོག་མི་གཅིག་པ་དྲུག་དྲུག་ཚོན་སྐུད་བསྒྲིལ་བ་ལྟར་འདོད་པ་མཚུངས་སོ། །འདི་རྣམས་སོ་མ་རཱ་ཛ་ལས། །སྙིང་རྩ་མཁྲིག་མའི་གོང་ན་ཡར། །ཐི་གུ་བསྒྲིལ་བ་ལྟ་བུ་སྟེ། །ཞེས་པ་དང༌། རྩ་མཛོད་ཀྱི་འགྲེལ་བར། རུས་པ་འབུར་པོའི་ལྡེབས་ལ་བལྟ་རྩ་སྟེ། །དེ་ན་དོན་སྙིང་དང་ནང་གྲོལ་ཐམས་ཅད་ཀྱི་རྩ་ཐི་གུ་བསྒྲིལ་བ་ལྟ་བུ་བཞིན་དུ་རྒྱུའོ། །ཞེས་པའི་དོན་ལ་བསམས་པར་ཟད་མོད། རྩ་མཛོད་རྩ་འགྲེལ་ནི་བོད་ཀྱི་སྨན་པ་ཅི་ཡང་མི་ཤེས་པ་ཞིག་གིས་བརྩམས་པར་འདུག་པས་གཏན་ཚིགས་སུ་མི་རུང་ཞིང༌།

སོ་མ་རཱ་ཛ་ནི། སྒྲ་ཇི་བཞིན་བསྒྱུར་མ་ཤེས་པའི་ཉེས་པ་ཙམ་མ་གཏོགས། རྒྱ་ནག་གི་སྨན་དཔྱད་ཁུངས་ཐུབ་ཏུ་འདུག་མོད། དེ་ལས་ཀྱང་སྙིང་རྩ་ཐི་གུ་བསྒྲིལ་བ་ལྟར་བཤད་ཀྱི་དོན་སྣོད་ཀྱི་རྩ་ཀུན་བསྒྲིལ་བར་མ་བཤད། དོན་དུ་གཡས་གཡོན་གཉིས་ཀར་དོན་སྣོད་དྲུག་དྲུག་གི་རྩ་བསྒྲིལ་ནས་ཡོད་ན་སྙིང་ལས་གཞན་པའི་རྩ་རྣམས་འཕར་བའི་རྒྱུ་མཚན་ཅི་ཡིན། མཆིན་རྩ་གློ་རྩ་སོགས་འཕར་ན་རུ་ཐུང་དང་སྒང་རྩ་སོགས་ཀྱང་མི་འཕར་བའི་རྒྱུ་ཅི་ལ་ཐུག གལ་ཏེ་སྙིང་རྩ་འཕར་བའི་ཤུགས་ལས་གཞན་རྣམས་ཀྱང་མཉམ་དུ་འཕར་བ་ཡིན་ནོ་ཞེ་ན། འོ་ན་དོན་སྣོད་ཀྱི་རྩ་རེ་རེ་དེ་དང་དེའི་རླུང་ཁྲག་རྒྱུ་བ་ལ་བརྟེན་ནས་འཕར་པ་མ་ཡིན་བར་ཐལ་བས་ནད་སོ་སོར་མ་འདྲེས་པར་རྟོགས་ག་ལ་ནུས། གཞན་ཡང་དོན་སྣོད་ཀྱི་རླུང་ཁྲག་ཐམས་ཅད་ཕྱིར་རྒྱུ་བ་ཁོ་ན་ཡིན་ལ། ཡར་ཟུར་དོན་ལྔ་ཕྱིར་རྒྱུ་གདགས་ཀྱི་རྩ། །མར་ཟུར་སྣོད་དྲུག་ནང་རྒྱུ་སྲིབས་ཀྱི་རྩ། །ཞེས་གསུངས་པ་དང་འགལ། དེར་མ་ཟད། ཚོན་རྩ་གཉིས་ཀྱིས་གློ་སྙིང་སྟོད་ནད་བརྟག །ཀན་རྩ་གཉིས་ཀྱིས་ཕོ་མཆིན་བར་ནད་བརྟག །ཆག་རྩ་གཉིས་ཀྱིས་མཁལ་རྐེད་སྨད་ནད་བརྟག །ཅེས་གསུང་བའི་མགོ་བོའི་ནད་བརྟག་པ་ལ་མགོ་བོའི་རྩ་དང༌། རྐེད་པའི་ནད་བརྟག་པ་ལ་རྐེད་པའི་རྩ། རྐང་པའི་ནད་བརྟག་པ་ལ་རྐང་པའི་རྩ་དང༌། རླུང་མཁྲིས་བད་ཀན་ལ་སོགས་པའི་ཕྲ་རགས་བརྟག་པ་ལ་དེ་དང་དེའི་རྩ་རྣམས་ཀྱང་ལག་པའི་བལྟ་གནས་སུ་རྒྱུ་དགོས་པར་འགྱུར་ཏེ། དོན་སྣོད་ཀྱི་རྩ་སོ་སོར་དགོས་པའི་རྒྱུ་མཚན་དང་མཚུངས་སོ། །གཞན་ཡང་སྣོད་དྲུག་གི་མཁྲིས་པ་མ་གཏོགས་གཞན་རྣམས་ལུས་ཀྱི་དབུས་ན་གནས་ལ། ལོང་དང་ལྒང་པའི་རྩ་གཡས་སུ་རྒྱུ་ཞིང༌། རྒྱུ་མ་དང་ཕོ་བ་བསམ་སེའི་རྩ་གཡོན་དུ་རྒྱུ་བའི་རྒྱུ་མཚན་རང་ཅི་ཞེ་ན། ལན་ཅི་ཡོད། སོ་མ་རཱ་ཛ་ལས། སྣོད་རྣམས་དོན་གྱི་རྗེས་སུ་འབྲང༌། །ཞེས་པའི་ཚིག་ཙམ་ཡང་མ་མཐོང་བར་ཟད་དོ། །ཡང་ཉིང་ལག་ལྔ་ལ་བལྟས་པས་དོན་ལྔའི་ནད་ཤེས་ཟེར་བ་ལག་པ་གཡས་གཡོན་ལ་ཁྱད་པར་ཡོད་དམ་མེད། ཁྱད་པར་ཡོད་ན་སོར་མོ་ལྔ་ག་ལ་དོན་ལྔའི་རྩ་མི་རྒྱུ་སྟེ་བལྟ་རྩ་ངོ་བོ་བཞིན། ཁྱད་པར་མེད་ན་ནི་སྐྱེས་པའི་ལག་པ་གཡས་ལ་གློ་མཆིན་མཁལ་མ་གཡས་དང༌། ལག་པ་གཡོན་དུ་སྙིང་མཆེར་མཁལ་མ། གཡོན་གྱི་རྩར་རྒྱུ་བ་ཡང་ཁས་ལེན་དགོས་པས། གོང་དུ་རང་གིས་བཤད་པའི་དོན་ཐམས་ཅད་ཉམས་པར་འགྱུར་ཞིང་ཐུག་མེད་དུ་ཐལ་བ་དང༌། ཡང་ཆགས་པའི་དང་པོ་ལྟེ་བ་ཡིན་ཞེས་སོགས་ལ་དཔགས་ན་བལྟ་རྩ་ནི་དབུ་མ་ཡིན་ཞེས་འདོད་པར་སྣང་སྟེ། དེ་ལྟ་ན་དབུ་མའི་ནང་དུ་རླུང་ཁྲག་རྒྱུ་བ་ཁས་བླངས་པས་དེ་འདྲའི་དབུ་མ་ངོ་མཚར་ཆེའོ། །མདོར་ན་འཕར་རྩ་རྣམས་གང་ལ་བརྟེན་ནས་འབྱུང་བ་དང༌། དེས་ནད་གང་ཡིན་རྟོགས་ནུས་པའི་རྒྱུ་མཚན་ཟུར་ཙམ་ཡང་མ་གོ་བཞིན་དུ་གཞུང་ལུགས་ལ་འགྲེལ་བ་རྩོམ་པའི་སྤོབས་པ་ཧ་ཅང་ཡང་ཆེས་པ་ཡིན་ནོ། །དེས་ན་ཁོ་བོས་རྡོ་རིང་མཛེས་བྱེད་དུ། ནད་རྟགས་རྩ་ལ་རྟོགས་པའི་རྒྱུ། །ཐུན་མོང་མིན་པའི་གནད་གང་ཡིན། །ཞེས་དྲིས་པ་ལ་ལོ་ཉི་ཤུ་སོང་ནས་ཀྱང་དོན་དང་མཐུན་པའི་ལན་མ་བྱུང་བ་ཡིན་ནོ།།

གཉིས་པ་གཞུང་དོན་ནི། བལྟ་གནས་ཞེས་པ་ནས་བོལ་ལ་བརྟག་ཅེས་པའི་བར་གྱིས་སྟོན་ཏེ། རྩ་བལྟ་བའི་གནས་ངེས་པ་ནི། ལག་པའི་མཁྲིག་མའི་གཉེར་མ་དང་པོ་སྟེ། གོང་མ་དེ་ནས་རྩ་བལྟ་ཡུལ་རང་གི་ཚོན་གང་མར་ལ་འཇལ་བའི་རུས་པ་འབུར་པོའི་ཟད་མཚམས་ཀྱི་ལྡེབས་དེར་སྨན་པའི་མཛུབ་གུང་སྲིན་ལག་གསུམ་ལ་རྒྱ་ནག་གི་བརྡར་ཚོན་ཀན་ཆག་ཅེས་གྲགས་པ་དེ་གསུམ་ལ་འདུས་པ་སྟེ། དབར་ཡངས་དྲགས་པ་དང༌། དོག་དྲགས་པ་མ་ཡིན་པའི་མ་རེག་ཙམ་སྙོམས་པར་བཞག་སྟེ་བལྟ་བའོ། །དེ་ཁོ་ནར་བརྟག་དགོས་པའི་རྒྱུ་མཚན་ཅིའི་ཕྱིར་ཞེ་ན། འཕར་རྩ་ཙམནི་མགོ་སྐེ་རྐང་པ་སོགས་ལུས་ཀྱི་སྟོད་སྨད་ཀུན་ལ་ཡོད་མོད་ཀྱང༌། དོན་སྙིང་འཕར་བ་དང་ཉེ་བ་སྐེ་དང་མཆན་འོག་ལྟ་བུར་བལྟས་ན་རི་གཟར་གྱི་ཕུ་ཆུ་དྲག་ཏུ་འབྲུབ་པའི་རྩར་མི་འགའ་ཞིག་ཕར་ཚུར་དུ་ལབ་ཀྱང་ཆུ་སྒྲ་དེའི་དབང་དུ་སོང་ནས་ལབ་ཀྱི་བརྡ་མི་འབྱོར་བ་དང་མཚུངས་ཏེ། དོན་སྙིང་ལས་གཞན་པའི་ནད་མི་རྟོགས།

དེ་བཞིན་དུ་དོན་སྙིང་དང་རིང་བ་མགོ་དང་རྐང་པའི་འཕར་རྩ་ལ་བལྟས་པའི་ཚེ་རྒྱ་གར་ནག་སོགས་ཐག་རིང་པོ་ནས་འོངས་པའི་འགྲོན་པོའི་གཏམ་ལ་བདེན་རྫུན་སྣ་ཚོགས་འབྱུང་བ་དང་འདྲ་སྟེ། ནད་ཇི་ལྟ་བ་རྟོགས་པར་མི་ནུས་སོ། །དེ་ལྟར་ན་གོང་དུ་བཤད་པའི་བལྟ་གནས་འདི་ཉིད་ལུས་ཀྱི་ལུས་ཀྱི་སྟོད་སྨད་དོན་སྣོད་ཐམས་ཅད་དུ་ཉེ་རིང་འཚམ་པ་ཡིན་ཏེ། དཔེར་ན་ཕུ་ཆུ་འབྲུབ་པའི་ས་ཇི་ལྟར་རིག་པ་ནས་མི་མང་ཉུང་གང་ཡང་རུང་བས་སྐད་གསང་མཐོན་པོ་སྨྲས་པ་དེ། གནས་དེ་ལས་གཞུ་འདོམ་ལྔ་བརྒྱ་ལ་རྒྱང་གྲགས་སུ་བྱས་པའི་ཚུལ་རོལ་ནས་དབང་པོ་སྐྱོན་མེད་པས་དབྱར་ཀའི་དུས་སུ་ཉན་པའི་ཚེ་ན། ཆུ་སྒྲ་དང་མི་སོ་སོའི་སྐད་མ་འདྲེས་པར་ཐོས་པ་བཞིན་དུ་ནད་རྟགས་རྣམས་ཀྱང་གསལ་བར་སྟོན་པ་ཡིན་ནོ། །དེ་ཡང་ཇི་ལྟར་ཡིན་ཞེ་ན། བལྟ་རྩ་འདིར་ལུས་ཀྱི་སྟོད་སྨད་དོན་སྣོད་ཕྱི་ནང་སོགས་ཀྱི་ནད་རྟགས་ཐམས་ཅད་རྒྱུ་བས་ན། ཚོང་འདུས་ཆེན་པོའི་རྒྱ་སྲང་བཞིན་གནས་པ་ཡིན་ནོ། །གལ་ཏེ་གཞན་དག་ན་རེ། སྙིང་རྩ་གཅིག་པོ་དེའི་ནང་དུ་དོན་སྣོད་སོགས་སྟོད་སྨད་ཕྱི་ནང་ཐམས་ཅད་ཀྱི་རླུང་ཁྲག་རྣམས་མི་རྒྱུ་བས་ན་ནད་རྟགས་རྣམས་རྟོགས་པ་འགལ་ལོ། །ཞེ་ན་མི་འགལ་ཏེ། ནད་རྟགས་རྣམས་རླུང་ཁྲག་དང་བསྡོམས་ཏེ་རྒྱུ་བ་མ་ཡིན་པའི་ཕྱིར་རོ་ཞེས་བྱའོ། །ཚོང་ཟོང་དང་འདྲ་བའི་རླུང་དང་བད་ཀན་དང༌། ཁྲག་དང་མཁྲིས་པ་ལ་སོགས་ནད་རྟགས་ལུས་ཀྱི་སྟོད་སྨད་ཕྱི་ནང་ཀུན་ཏུ་རྒྱུ་བས་ན་དྲག་པར་འཕར་བའི་ཚུལ་འདི་ཉིད་ཚོང་དཔོན་བཞིན་ཟོང་གང་ན་ཅི་ཡོད་ཀྱི་གཏམ་སྨྲ་བར་བྱེད་དོ། །དེའང་ཇི་ལྟར་སྨྲ་ན། ཟོང་སོ་སོའི་མིང་ནས་སྨྲས་པ་ལྟར་འདི་ནི་སྙིང་གི་ནད་ཚ་བའོ། །འདི་ནི་རྒྱུ་མའི་ནད་གྲང་བའོ། ཞེས་སོགས་དང༌། འདི་ནི་མགོ་བོའི་ནད་དོ། །འདི་རྐང་པའི་ནད་དོ། །འདི་ནི་བར་གྱི་ནད་དོ་ཞེས་དང༌། འདི་ནི་རླུང་གི་ནད་དོ། །འདི་ནི་མཁྲིས་པའི་ནད་དོ། །ཞེས་བྱ་བ་ལ་སོགས་པའི་སྒོ་ནས་ཕ་ཙེའི་རེ་སོ་ལྟར་དཀར་ནག་སྤེལ་བའི་ཚུལ་གྱིས་སྟོན་ནོ། །སྙིང་པོའི་གནད་ནི་བཤད་རྒྱུད་ཀྱི་འགྲེལ་པར་བཤད་ཟིན་པར་ལྟར། སྙིང་གི་རྩ་བ་ནས་གྱེས་པའི་རྩ་དྲུག་སྟེ། གཉིས་མགྲིན་པར་བརྒྱུད་ནས་མགོ་བོར་གྱེས། གཉིས་མཆན་ཁུང་རྒྱུད་ནས་ལག་པར་གྱེས། གཉིས་སྣེ་ཁུང་བརྒྱུད་ནས་རྐང་པར་གྱེས་པ་འདི་རྣམས་སྙིང་དྲག་ཏུ་འཕར་བའི་དབང་གིས་འཕར་བ་ཡིན་ཏེ། སྙིང་དང་རྩའི་འཕར་ཚུལ་གཅིག་ཁོ་ནར་མངོན་སུམ་གྱིས་བལྟས་པས་ཤེས་སོ།།


རིགས་མཐུན་ནང་དོན།
  • དུས་དོན་ཁམས་དང་རྩ་སྦྱར་བ་དང༌།
  • ༄༅། །དཔལ་ལྡན་རྒྱུད་བཞིའི་འགྲེལ་ཆེན་མེས་པོའི་ཞལ་ལུང་རྩོམ་པ་པོ་གཉིས་ཀྱི་རྣམ་ཐར་མདོར་བསྡུས་སུ་བཀོད་པ་བཞུགས་སོ།།

  •  

    ༄༅།། པར་དབང་ཀྲུང་གོའི་བོད་ཀྱི་གསོ་རིག་དྲ་བར་དབང་བས་ཕན་ཚུན་གྲོས་མོལ་དབང་བཅོལ་མ་བྱས་གོང་ལ་བཀོལ་སྤྱོད་བྱས་མི་ཆོག

     E-Mail:webmaster@arura.com.cn                                Tel:0971-8201019